巴西輸波

萬萬唸唔到足球王國巴西會輸法國1比0，結果非常令人失望。唸唔到巴西會食白果。
法國表現超勁，特別係施丹，令人刮目相看。
反觀巴西，頻頻失誤，交唔到波不單止，又無攻勢。表現懶懶閒，對住堂堂98年冠軍，氣勢同態度竟然同對住日本同加納等實力唔強嘅隊一樣，無d速度感，下半場開頭比人攞咗一分，仲慢慢嚟，又唔換入d後生進取嘅隊員，要到80分鐘後先開始努力。唉‧‧‧‧‧
我本來好想巴西同阿根廷爭冠軍，可惜兩隊雙雙出局。唉，決賽竟然無南美隊，同歐洲國家盃無大分別。
巴西呀！點解咁輕敵？點解唔落力d？前幾場你懶懶閒，以為你未出盡全力。唔敢想像你懶懶閒竟然係盡咗全力嘅表現。
阿根廷又輸埋，好唔抵‧‧‧‧‧
依家唔想法國同德國攞冠軍，唯有將寄望放係好耐無入過決賽嘅葡萄牙身上。
而前晚去中環Bar睇阿根廷，散場後，等咗好耐先有小巴，小巴途經地方〈包括尖咀同旺角〉都人頭湧湧，紅隧出口有長長等車人龍。
而個小巴司機，頂！一d都唔注重交通安全，跟車太貼，試過差d撞到巴士。我仲未想死住呀！(2006-July-02)